عيش حياتك بجد خليك موجود

لو كل حاجة عايز تعملها في حياتك متوقفة على حاجة تانية انت مش عاوز تعملها أو بتعملها لمجرد إنك مجبر تعملها ومفيش حل تاني وإلا حياتك هتبوظ وتتلخبط (ده طبعا من وجهة نظرك أو من ممكن يكون رأي اللي حواليك الي عايزين يعيشوا حياتك مكانك وبالطريقة اللي تريحهم هما )، لو كده فعلا أحب اقولك ومن كل قلبي وبأعلى صوت ألف ألف مبروك حضرتك مش عايش معانا في الحياة ...... انت مش هنا أصلا ... انت مش موجود ! يعني مثلا لو واحد اهله اجبروه انه يدخل كلية معينة هو مش عاوزها أو حتى دخلها لمجرد ان مكتب التنسيق العظيم والمحترم قرر ان مجموعه في الثانوية العامة ميجبش غير الكلية دي من غير حتى ما يفكروا يسألوه انت حابب تدرس ايه ؟؟ او يعرفوا قدراته وميوله وبغض النظر عن ان مفيش تعليم بجد في الكليات دلوقتي ولا حتى في أي مرحلة من مراحل التعليم في مصرنا المحروسة، بس أكيد لما تكون مبتتعلمش حاجة انت بتحبها أو مهتم بيها احسن بكتير(علي الأقل من الناحية النفسية والمود وكده يعني ) من انك تكون مبتتعلمش حاجة مش طايق تعرف اسمها ولا مهتم بأي حاجة فيها ! الواحد ده اللي مبيتعلمش حاجة مش حاببها لو كل مشاريعه وأحلامه والحاجات اللي بجد نفسه يعملها وحاسس انه لو عملها هيلاقي نفسه ويعيش اسطورته الذاتية لو كل ده متوقف على الشهادة اللي المفروض ياخدها واللي هو مش عاوز ياخدها ولا عارف ياخدها ومطلوب منه انه حتى ميفكرش في احلامه وطموحاته إلا لما يخلص دراسته اللي ملهاش أي علاقة بأحلامه أساسا وكمان حاسس انه حياته واقفة ولا عارف يشتغل أو بمعنى أصح مش عارف يحاول يشتغل ولا في واحده هترضى تتجوزه وهو لسه طالب ولا اهل هيرضوا يجوزوه بنتهم من غير ماتكون شهادته معاه يعني من الآخر كده مش عارف يواجه الحياة الحقيقية مش العالم الخيالي اللي جوة الجامعة ، الإنسان ده اكيد مش عايش بجد لأن ناقصه حاجات كتير قوي عشان يبقى موجود على سطح الكرة الأرضية وأولها انه يلاقي نفسه ويعرفها كويس وتانيها انه يبدع فالإبداع هو جوهر الحياة –ايه الكلام الكبير قوي ده- واكيد ان الإبداع ده مش لازم بس يكون في الفن والأدب وكده، لا ............................................ الإبداع ده ممكن يكون في أي حاجة وفي كل حاجة .. .ممكن يكون في الطبيخ ممكن يكون في الكورة او الرياضة عموما ممكن يكون في التجارة واكيد طبعا ممكن يكون في الإختراعات والبحث العلمي وده اللي احنا محتاجينه اكتر بس للأسف صعب قوي اننا نلاقيه في مصر في ظل الظروف الحالية – مش عارفة ليه حاسة النهارده اني بقول نشرة أخبار غلسة؟؟!- المهم هو اننا نلاقي الجزء المبدع جوانا ونطلعه ونلمعه وهو ده الجزء الصعب في الإبداع لكن بمجرد ما تعرف انت ممكن تبدع في إيه الموضوع هيبقى سهل وبسيط والأهم من كده انه هيكون ممتع المهم لما تلاقي الإبداع ده جواك متركنوش وتسيبه لما يحمض جواك لحد ماتخلص من حاجة عمرك ما هتبدع فيها ولا هتبقى مرتاح وانت بتعملها .. متوقفش حياتك وأمنياتك لمجرد انك مستني حاجة أهميتها بالنسبة ليك أقل بكتير من الأماني دي دور على نفسك ..... عيش حياتك .... اتحرك .... إبدع ... خليك دايما موجود ... وخللي شعارك في الحياة أنا أبدع إذن أنا موجود .....

لما نكون بنحب

لما نكون بنحب دايما بنكون مبسوطين ومودنا مظبوط حتى لو بنواجه مشاكل ومتاعب في الحب ده والحاجة الوحيده اللي ممكن تضايقنا هي ضياع الحب ده وده بقى سواء كنا بنحب حد أو بنحب حاجة أو حتى بنحب نفسنا !!! ويمكن تكون دي أهمية الحب للإنسان لأنه بيلاقي السعادة في الحب حتى لو فيه معاناة وتعب مبنحيش ابدا بالتعب ده وكمان ممكن نكون بنستمتع بالتعب ده زي بالظبط الواحد لما يكون بيحب شغله تلاقيه بيدي للشغل كل حياته مهما كان شغله متعب وميحسش أبدا بالتعب ولا يفكر إمتى هيرتاح .أو مثلا لما حد يكون بيحب حد وحبيبه ده مطلع عينه ومورييييه النجوم في عز الضهر – مش عز الدخيلة – هتلاقيه برده يسهر الليل في حبه وعمره مايحاول يزعله ويفكر ازاي ممكن يرضيه ويسعده ومش بيعيد يغير نفسه ويحب حاجات كان بيكرها ويكره حاجات حبها عشان خاطر اللي بيحبه . الحب ده حاجة غريبة جدا فعلا ... دايما بنفكر ان قلوبنا هي المسئولة عن الحب والعلم والعلما بيأكدوا ان العقل او بمعني أدق جزء بسيط من مخ افنسان مسئول عن المشاعر اللي بيحسها الإنسان من حب وكره وحزن وفرح وغيرها .بس انا شايفة ان لا القبل ولا العقل مسئولين عن حبنا لشخص معين او لحاجة معينه .. أكيد في حاجة أكبر من كده هي المسئولة الحاجة دي هي اللي بتشغل العقل اللي بيشغل القلب أو بمعنى أصح الحاجة دي هي اللي بتدي الأوامر للعقل انه يحب والعقل يقول للقلب فيدق ويضخ دم زيادة في عروقنا لما نشوف اللي بنحه .. الحاجة دي ممكن تكون الروح اللي لما بتقابل الي يسعدها بتحبه أو لما تلاقي الحاجة اللي ترتاح لها بتحب دايما تعملها وبالتالي الواحد مننا يعرف إنه بيحبها . البني آدم طول حياته بيفضل يدور على السعادة وبمجرد ما يحب ينسى يدور عليها لأنه خلاص لقاها ، عشان كده دايما نلاقي اللي بيحب سعيد أو مطمئن حتى لو كانت الدنيا كلها مطربقة فوق دماغه كفاية عنده إنه يشوف حبيبه أو يعمل الحاجة اللي بيحبها عشان يحس ان لسه في أمل وإنه ممكن يواجه الدنيا دي بحالها ويحطم كل العقبات والبلاوي اللي واقفة في طريقه وهي دي بقى الطاقة الإيجابية في الحب عشان كده بيقولوا حب ماتعمل ...... لأنك لما تكون بتحب ماتعمل هتبدع فيه وتخلص فتحقق نتايج عمرك ما كنت تتخيلها . وبفرض مثل ان في حد بتحبه في مشكلة هتلاقي نفسك بتعمل حاجات مكنتش تتخيل في يوم من الأيام ولايخطر على بالك انها تتطلع منك وده كله ليه ؟؟؟ عشان تخرج حبيبك من مشكلته .وليه مشكلة ربنا ما يجيب لحد مشاكل .. لو حبيبك طلب منك تعمل حاجة ضروري والحاجة دي انت مبتحبش تعملها ابدا وهو ألح وحلفك بحبك ليه والكلام ده هتلاقي نفسك بتعمل اللي بتكره وانت مش متضايق طالما هترض حبيبك وهو ده أكيد اللي كانوا يقصدوه لما قالوا ان الحب بيصنع المعجزات .

بتحب نفسك ولا ....؟؟؟

انك تكون راضي عن نفسك وبتحبها دي اهم حاجة ممكن تساعدك في خوض تجربتك الذاتية وأكثر شيء يخليك تقف في وش اعدائك اللي مش عايزين تجربتك تنجح و المتمثلين غالبا في الظروف والدنيا اللي كل ماتقف تخدك مقص توقعك تاني ( ما هي اصلها غلاسة ) . هو صحيح الموضوع صعب شوية يعني انك تكون راضي عن نفسك وبتحبها بكل عيوبها اللي انت عارفها كويس ومش مطنشها بس كمان مش عاملها حجة البليد زي ما بيقولوا هياخد من وقتك ومن عقلك ونفسك كتير بس الحكاية دي مش مستحيله ولو عرفت نتايجها كويس اكيد هتحاول بدل المرة الف مرة عشان توصل للمرحلة دي من الرضا عن الذات أو بمعنى أصح تقبل الذات والإقتناع بقدراتك الكامنة النايمة جواك لحد ما سيادتك تنخور وتحفر وتشيل من عليها التراب وتطلعها وتعملك كده كام اسطورة ذاتية مش بس تجربة عادية ....طب يا ترى إيه ممكن تكون نتايج الحكاية دي ؟؟ يعني أنا إيه اللي يخليني أوجع دماغي وافحر وأشيل وأحط ماتخلي النايم نايم بلا وجع دماغ ... لا خللي بالك نبرة كلامك دي مش عجباني ده كلام سلبي وتأثيره مش كويس بلاش منه وركز معايا .....وخليك إيجابي شوية من نفسك . أولا لما حضرتك تكون مقتنع بنفسك وبتحبها وراضي عنها هتبقى واثق فيها وده هيخليك تطلع لسانك وتلعب حواجبك وتحط ايدك في ودانك وتعمل مروحة في وش الدنيا لما توقعك وتقوم هوب مرة واحده قايم تاني وتقولها : ولو هتفضلي توقعيني طول عمري هفضل أغيظك وأقوم كل مرة أقوي من اللي قبلها . لأنك ببساطة لما هتقع هتبقى عارف ومتأكد انك هتقوم مهما كانت الوقعة جامدة لأنك عارف قدراتك وواثق من امكاناتك اللامحدودة . ثانيا ان حضرتك لما تكون واثق من نفسك وراضي بيها بالرغم من إنك عارف عيوبها كويس لانك ببساطة عارف ان مفيش حد مفيهوش عيوب هتحاول تتغير وتتخلص على قد ماتقدر من العيوب دي واحده واحده ومن نفسك كده من غير ما تكون محتاج لحد يدفعك للتغيير أو تستنى حد تغير نفسك وتصلح عيوبك عشانه (غالبا الحد ده مبيجيش ولو جه مش بيبقى في الوقت المناسب أحسن لك تغير نفسك بنفسك) يعني هتبقى انت نفسك دافع لنفسك . أما ثالثا بقى فهي انك لما تكون بتحب نفسك وراضي عنها ومقدرها هتعرف أزاي تحب غيرك كويس يعني هتحب اللي حواليك صح لاهتيجي على نفسك عشان حد مايستاهلش ولا هتبهدل حد بيحبك بجد معاك . والخلاصة انك هتعيش حياة سوية وتبقى إنسان ريجيولر regular مش ارريجيولرirregular