خدعوك فقالوا كلية عملية
بقالي خمس سنين بقول أكيد العملي السنة الجاية هيبقى أحسن و أكيد هتعلم في يوم من الأيام الطبيعي أو المفروض إن كلية الطب كلية عملية يعني اللي يدخلها يتخرج منها دكتور يعرف يشخص ويكتب علاج مناسب للحالة لكن الواقع وبما أننا في مصر مش في أي بلد تاني مفيش طبيب امتياز (ميزو ) بيعرف حاجة في أي حاجة وكذلك معظم النواب اللي المفروض متفوقين وده ببساطة لان كليات الطب في مصر أساسا ملهاش أهداف تلاقي كل دكتور يمسك رئيس قسم كل همه يغير جلدة الكتاب العتيق عشان يوهم الطلبة انه مختلف ويجبرهم إنهم يشتروه. و بعدين تيجي في ال3 سنين الأولى تلاقيهم يقولوا لك دي سنين تجميع العلم يعني هتاخد البيزك نولدج و يتضح بعد كدة إنهم زي الثانوية العامة بالظبط كل همهم انك تجاوب زي نموذج الإجابة عشان تجيب مجموع يعني م الآخر تصم الكتب اللي أنت أصلا مش عارف بتتكلم عن إيه وتدخل تدلقها في ورقة الإجابة بالنص زيك زي أي ريكوردر . نيجي بقى لسنين الكلنيكل اللي المفروض تتعلم فيها ازاي تبقى دكتور بجد المفروض السنين ال3 الأخيرة من الدراسة بتكون في المستشفيات الجامعية على أساس يعني إن الطلبة تعيش في الجو وتكون قريبة من الحالات اللي هيتعلموا عليها. اللي بيحصل من الآخر انك بتروح تاخد غيباك وتسمع كلمتين نظري _ده إن سمعتهم أصلا_ وأنت طبعا قاعد في قاعة محاضرات حقيرة ملهاش اى علاقة بالمستشفى و بعدين تروح زي الشطور عشان تذاكر كميات النظري المهولة التي تحكي لك بالتفصيل تاريخ الطب في العالم ولا علاقة لها على الإطلاق بالطب الحديث وطول السنة تفضل كده من الآخر لو اتخرجت من الكلية مبتعرفش الألف من كوز الدرة تبقى أنت أكيد أكيد أكيد في طب المنصورة
ليست هناك تعليقات:
إرسال تعليق