طنش وعيش

........حاجة بايخة جدا انك تعمل حاجة مبتحبهاش خصوصا لو مجبر انك تعملها وإلا. كان عندي الاحساس ده بالبواخة والضيق وانا بحضر راوند (سكشن بس في كليتي العظيمة يبقى اسمه راوند) لدكتور مش طايقة ابص في وشه أو اسمع صوته يمكن لأنه شايف نفسه حبتين زي معظم المعيدين في الكليه وموراهوش غير المنظرة على خلق الله الغلابة بالكلمتين اللي ربنا فتح عليه بيهم وعرفهم ، بس للأسف كنت مضطرة احضر بسبب اغبى حاجة عرفتها في حياتي من يوم ما دخلت المدرسة وحتى الآن وهي الغياب. فضلت طول الساعتين بتوع الراوند أأفأف وأتململ في جلستي وشوية ابص في الأرض وشوية أبص للكشكول وشوية أبص للجنبي لحد ما خلص الراوند ولقيتني واقفة اتنهد تنهيدة طوييييييييلة لأنفض بها كل الأرف والزهق عن نفسي وأغير مودي وانطلقت مع الشلة الى السنتر عشان نضرب السندوتش المعتبر وكوباية النيسكافييه الاساسي كل يوم لزوم الفوقان والصحصحة بس للأسف ملحقتش اغير مودي ورجعت انيل من الأول ونفسي اتسدت وقلت هوا يوم باين من أوله . ببساطة حسيت اني هبلة وعبيطة .... حسيت اني ولا حاجة .... احساس جامد جدا بالمرارة امتلكني بعد ما حدث طب ايه اللي حصل لكل ده ؟؟؟ اكيد لما تشوف حد عزيز عليك جدا ويطنشك وميعبركش ولا كأنه كان يعرفك في يوم من الأيام ، اكيد هتندم على كل لحظة عرفت فيها الإنسان ده وهتقول ياخسارة العشرة والأيام والمعزة اللي بينا !!!! اكيد هتقول لنفسك للدرجة دي انا هنت عليه؟!!! زي مانا قلت لنفسي للدرجة دي مبقتش عايزة تعرفني وانا اللي كنت فاكراها بتحبني زي ما بحبها !!! أما أنا طلعت عبيطة بشكل!!!!! وبعدين هتفضل تعيد وتزيد وتفتكر المواقف اللي جمعتكوا ...... الفرحة اللي قسمتوها سوا ....الدموع اللي نزلت من عنيكوا في نفس الوقت .....وتقول معقول كل ده كان كدب .. كان تمثيل؟؟ ويمكن برده تأنب في نفسك وتدور على سبب يخليه يعمل كده معاك وتقول يمكن مخدش باله ... مشفنيش ... بس مخدش باله ازاي وعيني في عينه ؟؟؟ طب يمكن زعلان من حاجة أو أنا غلطت في حقه من غير ما اخد بالي ... طب ماقلش ليه ؟؟ ولا هو لعب عيال؟؟ وفي الآخر وبعد ما تهري نفسك من التفكير هتتوصل لحقيقة علمية غريبة جدا وهي ان البني آدم ده ما يستهلش ولا لحظة من اللي زعلت نفسك عشانه فيهم ، ولا يستاهل كل النكد اللي انت نكدته لنفسك ولا حتى يستاهل انك تضيع على نفسك الفطار التمام مع باقي اصحابك وتعكنن عليهم ايامهم . وببساطة هتطنش انت كمان وتعيش وتقعد تعدد لنفسك بعض الامثال الشعبية المتينة من عينة : من حبنا حبناه وصار متعنا متاعه ومن كرهنا كرهناه وحرم علينا إجتماعه ومش بعيد تخترعلك مثل محترم وتبقى إستفدت من التجربة وأبدعت أبداع (تهييسة) محترم . ده مفيش احسن من الهنتريش المحلق ابو اجنحة على رأي عمرو أديب