بالعقل

إحساس جميل انك تحب و تتحب ، لكن تبقى مصيبة ومشكلة كبيرة لو قسمنا الجملة. قصدي يعني لو انك حبيت بس أو اتحبيت بس ، هتقولي طب الأولى وعرفناها ، حب من طرف واحد ، سهر ، وبكى ، وشرود ( مأساة الحب). لكن لو اتحبيت من غير ما أحب هتبقى إيه المشكلة ؟؟؟؟! اقوللك أنا إن لو عندك شوية دم ولو جربت الحب من طرف واحد قبل كده ، هتحس بالذنب تجاه الإنسان اللي بيحبك أنت لأ وبالتالي إحساسك ده هينكد عليك وهتبقى عايز تعمل أي حاجة عشان تتخلص من إحساسك بالذنب و ممكن تعطف عليه وأنت مش قاصد وهو يفكر انك بنحبه وتبقى كده اتورطت يا حلو. أصلك لو قلتله لأ مبحبكش هيقول خاين وخدعني ولو كملت هتكمل مع حد مبتحبوش والحالتين مشكلة كبيرة عشان كده لازم تاخد بالك من الأول لازم تقطع عرق وتسيح دم وتعرف اللي قصادك إن كنت بتحبه ولا ..... أما الحب من طرف واحد فهو اكبر مأساة ووهم ممكن يعيش فيهم بني ادم رومانسي حبتين ولهؤلاء المعذبين أقول: ليس هناك حب للأبد ولا حب من أصله الحكاية كلها شوية أفكار بنقنع نفسنا إن قلبنا هو المسئول عنها لكن هذا غير صحيح أيها السادة إليكم الخبر اليقين، اللي عاوز يحب بيحب واللي عاوز ينسى بينسى وده كله في ايدك أنت ...أنت بس. أنت ممكن تقنع نفسك بأهمية شخص ما لك وأنت أيضا من يستطيع وضع هذا الشخص في حجمه الحقيقي بالنسبة لمشاعرك وعقلك. أنت فقط من دون الناس القادر على علاج نفسك من هذا الوهم الكبير و الكذبة الحمقاء التي صنعتها بيديك لا بيد غيرك. إذا سألتني كيف؟ أجيبك بان الموضوع بسيط زي شكة الدبوس بالظبط . حضرتك تدخل اوضتك وتقفل على نفسك الباب وتضع صورة من تتخيل انك تحبه أمامك ولتستعرض هذا الشخص على حقيقته أمام عينيك_ استعرضه بعقلك الحقيقي لا بقلبك وأوهامك_ ستجد الكثير من العيوب الشخصية بجانب العيب الكبر انه لا يحبك ولا يعيرك اهتمامه قل لنفسك وقتها اللي ميحبنيش محبوش واللي ميعبرنيش معبروش واستمر في ترديد هذه الجملة كثيرا حتى تنام .. استيقظ في الصباح ستجد إحساسك تجاه هذا الشخص قد تغير بدرجة ما وده يرجعلك طبعا ويرجع لذمتك في تنفيذ الخطة السابقة . و إذا فشلت فأنت تحب هذا الشخص وراضي بعيوبه كلها وقتها إذا كنت تقدر تقوله حقيقة مشاعرك نحيته فلتفعلها وإذا صدمك بقوله انه لا يحبك ولم يفكر فيك مطلقا إلا كصديق أو زميل أو أخ ( معرفش ازاي يعني) سوف تكون هذه الصدمة كافية لتجبر نفسك على النسيان ( الحقيقة كرامتك اللي اتبعترت هي اللي هتخليك تنسى) فلتكن عاقلا يا بني ولتوفر مشاعرك النبيلة وأحاسيسك الجميلة لمن يستحق حبك لمن يحبك وتحبه لا بد أن يكون الشعور متبادل لتشعر حقا لتشعر حقا بالسعادة التي تبحث عنها في الحب والتي لن تكتمل أبدا إلا بوجود من تحبه ويحبك . لو جينا بقى للناس اللي بتحب وتتحب فانتوا ممكن تكونا غلطانين ركزوا معايا شوية صحيح مراية الحب عميا والحب ميعرفش غني ولا فقير ولا صغير و لا كبير بس إحنا كمان مش لازم نقف في وش المدفع ونحارب الدنيا كلها وقوانين الكون يعني من الآخر مش لازم تكونا زي عنترة وعبلة وقيس وليلى والناس دي اللي منبهاش من الحب غير الهم والارف والموت في الآخر . يعني متروحش تحب لي بنت مليونير وأنت ابن الموظف المأروف _ خلي عندك شوية نظر _ وأنتي كمان متروحيش تحبي راجل متجوز وأنتي لسة مطلعتيش من البيضة ، بلا وجع دماغ بلا قرف مفيش أحسن من الحب المتكافئ المناسب لكل الأطراف. هتقولوا إحنا لازم نضحي من اجل حبنا ونكافح عشان نبقى مع بعض وكلام الأفلام العربي القديمة ده أنا رأيي انكوا تكافحوا عشان تلاقوا شقة وتعرفوا تفرشوها لو ناويين تكملوا مع بعض أصلا ، أما بالنسبة للناس اللي ربنا كرمها ولقوا الشقة فكافحوا برده عشان تقدروا تعيشوا وتحافظوا على فلوس أهاليكم لو فعلا تستحقوها . آه ما هو إحنا معندناش حب من غير جواز ، في جواز من غير حب ،لكن هتعملوا نظام الأفلام والمسلسلات العربي البايخة اللي ربنا مبتلينا بيها يبقى بلاه الحب ده أحسن. مش بعيد الواد يروح يبيع مخدرات عشان يعرف يعزمك في المطعم الفيف ستارز اللي ابوكي بيتغدا فيه أو انه يطلب منك تتجوزيه من ورا مراته عشان مشاعرها وطز في مشاعرك أنت ويا وقعة سودا لو كان عرفي يبقى رجتي في داهية يا قمر ويا خسارة شبابك اللي راح هدر كل عيلتك هتتقلب صعايدة وياخدوا بتارهم عاد وجولي على نفسك يا رحمن يا رحيم . وأخيرا أقول لنا جميعا العقل مطلوب في الحب أيضا